鋒狂德意志Week 17 – 19 冰島追極光之旅

其中一個我黎Working Holiday嘅目標就係睇北極光, 原本想諗住去芬蘭睇, 只係陰差陽錯飛左黎冰島睇, 仲要真係睇到噃.

如果你係facebook click 入黎嘅, 應該開左Youtube聽緊首歌,未?
快啲聽住黎睇呢篇文啦: Sigur Rós – Hoppípolla

三五成群柴娃娃成團

我地一行五個人(Ken, Grace, 花花花, Reyan,我)柴娃娃成團,九月尾果陣約埋十一月尾去冰島。

一路都以為去冰島啫,咪又係同去其他地方一樣,至多咪好似之前去日本自駕遊咁自己揸車,仲要計埋我有兩個司機實無死啦,完全唔知呢次係一個極度好彩嘅死亡之旅。

Google map喺冰島係信唔過嫁

好啦,越近旅行日子我就開始睇下”就嚟去冰島自駕遊,有乜要注意”,一睇就知瀨野啦呢鋪。事關:

  1. 冰島地大人少,如果係渣渣下車,架車半路跪低,隨時行番個零兩個鐘先見到下個有人嘅地方,你都咪話唔過癮好玩啊。
  2. 冬天去冰島有一定程度嘅危險性,因為地理位置嘅關係,冰島天氣變化非常快亦都可以去得好壞,而環繞得曬成個冰島只係得一條公路(1號公路)。而呢條公路係天氣極差嘅情況下,係可以落雪落到1號公路都封左嫁。今次出發之前一個星期就正正發生封路,我地嚇到鼻哥窿都無肉,深怕我地揸車環島去到一半封左條路,唔上唔落趕唔番去首都趕飛機就GG啦(好左成個過程都無驚無險)。天氣同車嘅穩定性令到個旅程增加左唔少不確定因素。
  3. Goggle Map點解喺冰島係信唔過呢?因為正如上面咁講,冰島天氣係變幻莫測,睇定天氣報告都搞唔掂。而我地plan行程果陣就係用左Google Map去計下每個check point 要用幾耐時間。但係Google你無野阿嘛,300幾公里嘅路你同我講用3個鐘頭就到?啫係我落住雪,路面結曬冰都仲可以踩 100km/h?結論就係夏天去冰島都還好,如果冬天去嘅話將Google個參考時間愁番1.5/2穩陣啲。

    有圖有真相,Source:anxiousadventurers.com

嘩,瀑布啊,懸崖啊,湖啊雪山啊。嘩,又係瀑布懸崖雪山湖啊。

幫我地架車留個倩影之餘,張相簡直可以落廣告咁濟。 渣車去冰島?渣Subaru。

我地喺Keflavik(凱夫拉維克)落機即刻去左必到Blue Lagoon浸個溫泉敷Mask,然後再係Reykjavik(雷克雅未克)留左一日多啲,喺衝入大自然同一片虛無嘅懷抱之前最後一次感受下冰島最文明最多人嘅地方。

Blue Lagoon (藍湖)
冰島火箭教堂

離開左雷克雅未克正式開始我地冰島環島之旅,冰島被喻為地球上的火星,溫泉瀑布冰川冰湖火山地熱高山平原⋯⋯一個國家可以睇曬。而我地就好似大鄉里出城,無見過大蛇屙尿咁,一朝早離開文明無耐隨隨便便見到條瀑布仔就已經嗌要停車,影番半個鐘瀑布茫草斜陽乜乜乜先心息。

見到一個冰湖,”嘩冰湖啊,好靚好有feel啊,停車停車。”,咁樣又去左九個字。

冰島望夫石

如是者去到旅程嘅中後段,除非係一啲非常特別嘅自然景觀,我地已經唔係景點mark低左嘅唔會停低睇,去到一個化嘅境界。

藍冰湖

極光,係北極光啊!

去冰島睇湖光山色嘅人,我想信10個有9個半係會睇到有短暫嘅思覺失調,成日有幻覺。一日到黑係岸邊「睇到」鯨魚,點知只係兩舊遠到爆嘅礁石,海浪撞上去濺起水花,望落似鯨魚上去透氣。成日夜晚趕車向窗外睇風景嘅時候,總係會咁好彩睇到極光,到頭來原來都只係將城市嘅光霞同一舊又遠又厚嘅雲撈埋一齊做瀨尿牛丸。

其中五個思覺失調患者遊冰島時候,最常出現嘅幻覺就係「見到」北極光。第一次病發出現喺前往第二晚嘅Airbnb途中,一行五人除左司機,其餘四位乘客集體出現幻覺,將舊雲同城市嘅光溝埋左一齊做瀨尿牛丸。(我始終覺得果四位乘客當日見嘅窗簾帶北極光,真係只係一匹窗簾布)

如是者,五位患者喺接下來將日繼續輔洗發病。直到第四日,去到一間同市中心有啲距離嘅Airbnb ,就係我同司機Ken大大咋咋林沖完涼食完個飯,坐喺屋外「乘涼」啤兩啤。屋主行左落黎解決Wifi嘅問題,同佢吹水講開我地仲未睇到北極光,屋主仲諗住安慰我地接下來旅程一定有機會睇到云云之際,佢轉個身岳高頭指住個天就話啦 : “This is the Northern Light, definitely the Northern Light.”果下嘅淡淡然,同我地好有祈待嘅心情完全有個天與地嘅分別。

下咩話?果幾條野就係北極光?我仲以為係雲tim,oh my fucking god , seriously? 一路嘩嘩嘩,oh my fucking g,波野波羅密,唔好咁快無啊,即刻走番入屋拎番相機腳企,set好野,咔嚓,我嘅北極光啊。

就係咁,個人喺極度亢奮狀態下亂咁講野,然後再一次捕捉到北極光。

 

感言

正如Google搵到嘅資料,其實冬天去冰島嘅意外及死亡率都唔低。成個旅程落嚟,環完成個冰島無遇到大風雪封路炒車,無發生天與地嘉明事件,真係超級好彩。

成個旅程,除左係一個自己同大自然對話嘅機會之餘,望住浩瀚嘅星河同澎湃嘅瀑布,更係再一次引證”人類係幾咁渺小”呢句說話。

如果經濟學嘅2/8定律喺工作假期都成立嘅話,咁我諗我八成最深刻嘅回憶就呢兩成嘅時間上面。

 

有興趣嘅朋友,可以去鋒狂德意志 JonWHDeutschland 俾個Like同Follow我, 又或者可以直接Follow我個Wordpress。
Flickr: 鋒狂德意志 Deutschland Working Holiday

Advertisements

Author: Jonathan Lee

90後港大新鮮失業生 (Fresh Graduate), 一畢業就失業 唔識死唔認命 一口唔咸唔淡無尾音德文, 出走德國Working Holiday一年 係光怪陸離嘅香港拉番我嚟現實之前 堅離地一次

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s