鋒狂德意志Week6.2 – 滑浪唔一定要去海灘嘅

過左黎慕尼黑一陣,我好鍾意呢度其中一個同香港好唔同嘅地方,就係對夏天嘅詮釋。係香港,一提到夏天,「陽光與海灘」就自自然然浮左出黎。不過係慕尼黑,對唔住,陽光就有,海灘欠奉,試下「陽光與河邊」或者「陽光與草地」啦。

Isar (伊薩爾河)

Isar係一條流經拜仁境內嘅一條河,全長295公里,位於慕尼黑市中心東邊。由於慕尼黑四面無海,Isar就成為左當地人游水曬太陽嘅消遣地。細細個啲大人就教我地「千萬唔好係條河游水」、「欺山莫欺水啊仔」;呢度班友完全係無呢種概念,當中嘅落差感令我好鍾意每個星期都去Isar望下班友又有啲咩搞作。由普普通通咁游下水,到坐係個水泡或者攞一塊大浮板好似去左長隆水上樂園咁玩飄流,甚至乎涉水上Isar河中間一個島仔燒野食,鑊鑊新鮮鑊鑊甘。係我呢個外人望落去,成件事好似有啲痴線,但係放係佢地身上又好似正常不過咁。

而我同WG roomate亦都會襯週末好天氣去Isar河邊曬下太陽,順便食花生望下眾女子展示佢地嘅姣好身段,在此出賣下敘行利亞巴打健美身形。

Englischer Garten (英式花園)

除左Isar嘅「陽光與河邊」,Englischer Garten嘅「陽光與草地」亦係我好鍾意去嘅地方。比起河邊,曬太陽同青草地對我黎講係更加格格係不入,但係呢度曬太陽嘅人望落比Isar更多(可能呢度逼啲,望落好似多人啲掛)。雖說叫Englischer Garten, 但係除左個名,我其實都唔太知道點解個花園會叫英式花園。但係呢個花園真心都幾大下,由成個花園橫跨左最少6個U-bahn站可以略知一二。之餘,呢個花園亦都有兩條大開叉嘅溪仔俾人可以游下水咁(有時係呢度對大細嘅概念會令我唔知叫佢做河定溪好)。

除此之外,Englischer Garten周圍就好似有條邊界咁。一踏過呢條界入到Englischer Garten,隨左殺人放火之外,你唯一要守嘅規矩就係無規矩,話知你係度食煙飲酒講粗口。你可以隨便坐係樹蔭底下睇書,又或者平躺係草地河邊曬太陽(當中亦見有唔少男男女女係度裸曬),跳河盪水繩都有得玩。有次仲見到個成身耶穌打扮咁嘅阿叔手執一支拐仗坐係河嘅到邊,同河另一邊玩水嘅死肥仔隔河對罵掟石。

比起Isar,其實我更鍾意去Englischer Garten,因為你係香港絕對唔會見到咁大片草地,仲要係可以俾你發曬癲周圍走,草地請隨便踐踏。唔好同老子講維園或者佐敦谷公園,因為果種爽同靚草地嘅級數係無得比。係呢度我可以獨佔一個樹頭,坐係樹蔭下面,擺低一支可樂或者一杯咖啡,點起一支雪茄,然後打開本書扮下文青,享受接近黃昏帶黎嘅餘溫。(利申,我真係有睇書嘅。)

但係比起呢啲,我鍾意Englischer Garten係因為以下呢樣野:

Eisbach Surfwelle

係一個四周圍都無海嘅城市,竟然俾班友搵到一個渾然天成嘅地方黎滑浪,試問有咩野係俾呢樣更痴線呢?呢度係Englischer Garten最南邊嘅其中一個出口,沿住行就會見到一班遊客大人細路係條橋上面圍觀,睇嘅就係呢樣野。

Surfwelle原先只係急流暗湧嘅出水口,唔知幾時唔知咩人抽起條筋攞起塊衝浪板向呢度一跳,至此呢度就成為左衝浪聖地。呢度個「浪」雖然每次只夠一個人滑,但係每個滑浪客都好守秩序咁係河嘅兩邊排隊,每邊輪住享受衝浪帶黎嘅快感。有啲高手會跳板踩上浪頭再演兩下花式,初學者或者會係河邊踩定塊板等自己食到個浪先再上板,即使係咁附近嘅人都只係投會欣賞鼓勵嘅目光。而且每個衝浪客都會好自律,唔會獨佔個「浪」,不論高手定低手,留係個浪頂快定慢,每個人只要玩到咁上下時間,就會向後跌,讓個浪出黎俾下一個滑浪客。

有時衝浪對一啲唔會唔識唔想玩嘅人黎講好似好遠,但係呢度提供一個機會俾人近距離睇下衝浪究竟係咩一回事。或者因為咁,呢度先會駐紮左咁滑浪愛好及非愛好者。下面係我行經Surfwelle時候見到有高手表演拍低嘅。

其實黎到慕尼黑,唔洗下下衝景點嘅。呢度都有啲特色野你估佢唔到,一味顧住衝景點就會miss左呢啲野。其實去其他地方旅行都一樣,不妨留一兩日係hea遊城市,或者你會感受更多更深。

 

有興趣嘅朋友,可以去鋒狂德意志 JonWHDeutschland 俾個Like同Follow我, 又或者可以直接Follow我個Wordpress。
Flickr: 鋒狂德意志 Deutschland Working Holiday

Advertisements

Author: Jonathan Lee

90後港大新鮮失業生 (Fresh Graduate), 一畢業就失業 唔識死唔認命 一口唔咸唔淡無尾音德文, 出走德國Working Holiday一年 係光怪陸離嘅香港拉番我嚟現實之前 堅離地一次

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s