Vibrance7天九州自駕食玩訓買好西 – Day 4 (軍艦島, 雲仙)

Day 4, 我心目中整個旅程嘅重頭戲。因為今日我地會剷落長崎去無人島(軍艦島)再過雲仙浸溫泉。
早一晚,Yuko已經同我地講左今日佢會好早出門口所以要訓先,我仲諗住我地今日會早出發,有機會同佢講拜拜tim。點知,8點我地預備好曬要起行啦,Yuko原來已經出左門口工作。咁唯有同佢個同屋友交待聲,然後繼續我地旅程啦。

由於渣車由東彼杵町渣落長崎要1個鐘車程,我地決定渣半個鐘先,係沿途嘅停低食個早餐先再落去。去到預定嘅中途站停低食早餐之際發生左段小插曲,就係飲飲食食組原本打算食早餐果間餐廳未開店,我地係附近擾擾攘攘15分鐘,先係附近一間類似吉野家嘅野停低搞掂算數。不過入到去,又係另一番景象,打開menu一睇,竟然有刺身飯做早餐wo,仲要有大中細同mega揀。我就食左吞拿魚刺身加山藥泥飯,我第一次食山藥泥,食落就無咩特別味道,不過質感就非常似鬼口水。填飽個肚就繼續行程。

落到長崎,我地第一站行程係去長崎原爆資料館。

長崎原爆資料館
1945年8月9日,上午11時02分。小胖子原子彈投下,從此成為溶了鐘的時間

由資料館入口一路走落,心入面嘅沈重就好似壓住胸口咁,有點呼吸困難。氣氛就好似奧斯維辛集中營一樣咁壓抑。一路走,一路見到一件又一件熱溶嘅頹垣敗瓦;一個又一個活體病變個案。究竟我地掌控幾多科技,科技掌控左我地幾多呢?儘管如此,我對日本人係原爆資料館推砌成自己係受害者呢個行為非常嘅唔認同,畢竟佢地國家有份發動二次大戰,侵略中國,侵略香港。你總不能在那邊女姦男殺之時,又嚷著別人大把大把收割你的國民性命不公平吧?不然別打仗好了,搓包剪搥罷了。再者,直到今時今日,日本以至日本人都重未正視二戰及其錯誤,係呢方面日本人真係差德國人幾皮。

行完原爆資料館,我地分道揚鑣。一班去軍艦島,另一班留低睇大浦天主堂同眼鏡橋。而我就同另外4個莊友上船出發去軍艦島啦。

軍艦島

一般上可以搵到中文教學或者官網翻譯教你點買船飛嫁啦,最緊要你搵清楚搵岩你上船嘅碼頭係邊度。因為有幾間船公司去軍艦島嘅,而每間上船碼頭亦都唔同,去錯地方就唔好啦。船飛連導覽大概300蚊港元,3個鐘行程連來回,當中包括環島遊同上岸參觀。

軍艦島原名為端島,位於長崎半島以西4.5公里,由當時嘅三菱石炭礦業所擁有。由於島嶼嘅四周圍有石牆圍住,而內部又有鋼筋混凝土高層住宅林立,令到其外形好似”土佐”號軍艦,因此被稱為軍艦島。係煤礦關閉之後,軍艦島就一直成為無人島,慢慢入面嘅建築日久失修,直至2009立入世界文化遺產,軍艦島再次出現係世人眼中。

踏上去軍艦島,千祈唔好以為有得周圍走。因為日久失修嘅關係,好多地方已經變成左危樓,有倒塌危機,所以上到岸只能係三個固定觀景點遊覽。反而坐船有機會成個島嘅周圍都睇一次。

軍艦島
軍艦島
講故仔嘅導遊伯伯

企係呢個曾經人口密度密過香港嘅地方,1974年變成死城至今,遺留落黎就只有見証過文明、見証過有人居住嘅危樓;同埋生命力旺盛嘅植物。彷彿人類再偉大,係時代嘅巨輪下,我地依然渺小,不值一提。我覺得去睇下軍艦島係一個幾岩嘅決定,畢竟呢度曾經推動過一個經濟嘅發達。


搭船番去有文明嘅地方,岩岩嘅3個鐘就好似一個時光旅行咁。見仲有啲時間,我地決定行去大浦天主堂睇下,之後再後眼鏡橋join番分開行動嘅莊友。

大浦天主堂沿途
上大浦天主堂大斜路,沿路商店都係手信鋪頭,想一次過買曬九州名產,呢度幫到你。
大浦天主堂

叫得天主堂,咁啫係一間教堂黎啦,無錯係要俾錢嘅。而由於就黎到閉館時間,加上天主堂附近做緊番新工程,我地決定影張到此一遊相就算數。然後我地就渣過去眼睛橋匯合啦。

眼睛鏡,因橋與橋嘅倒影連埋一齊形如眼鏡,因而得名。

係眼鏡橋同分開活動嘅莊友匯合之後,我地就直接出發去雲仙啦。雲仙係一個比起長崎更鄉郊嘅地方,你甚少會見到有旅遊達人寫雲仙,但係你以為果度無值得去嘅地方你就錯啦。

駛往雲仙沿途嘅日落

會去雲仙嘅原因,係因為我地定左有一晚係住溫泉旅館嘅,而由於當初地震改行程嘅原故,我地決定由大分縣改去係雲仙浸溫泉。其實一路渣車,我個心都有啲擔心旅館質素會唔好,因為當初傾行程期間有莊友𨳒我揀得貴。但係我地去到見到間旅館,同埋間旅館對住個景,我就知道乜都抵番曬。

雲仙九州大酒店,唯一一間對正雲仙地獄嘅溫泉旅館,房間對正雲仙地獄,風景儼如人間仙景
房間窗外風景,日頭比較光望落少啲煙,但係一到夜晚就好似仙景咁。

去到,搞完一輪雞同鴨講嘅check in (無錯,因為雲仙實在太鄉郊啦,由book房到check in, 幫到你嘅就只有日文同goggle translate)。就去食晚飯啦,而由於我地一行11人嘅關係,旅館方面就預留左一間私人宴會廳俾我地,再幫我地upgrade做懷石料理。

懷石料理@雲仙九州酒店

 

我地呢班大學生大鄉里出城,邊有幾可食過懷石料理。望住檯而上精緻嘅菜式,係一輪瘋狂嘅影相,因為真係未試過係一間和式宴會廳坐係一張跪坐嘅檯面前,食一餐懷石料理。望住一檯嘅餸,初初仲心諗食飽就未必嫁啦,夠食啦都叫。但係食食下拎起張菜單一睇,就知自己失言啦。

當晚餐單

因為當晚成餐,由頭盤去到甜品夾埋係有十二道菜,呢鋪唔荒唔十二道鋒味啦,千祈唔好以為計埋頭盤甜品得十二道菜係好少野,岩岩張相影到成檯都係野都只係講緊四道菜咋。最重要嘅係,懷石料理嘅重點係慢慢食慢慢品嚐,當你慢慢咁食食足個半鐘,到第九、第十個菜,一個再肚餓嘅人,去到呢一刻都只會覺得剩低嘅菜餚係一負擔,而唔係一份心意。還好我係一個大食持久嘅人,佢上菜上咁耐,我就食足咁耐,一啲都無同佢浪費過。
食飽飽,沖埋涼,咁就當然係浸溫泉啦。呢間溫泉旅館設有四個唔同嘅溫泉,比較可惜嘅係佢地無私人風呂。而溫泉呢啲咁私人嘅野,我無影到相,有興趣嘅可以上去佢地官網望一望。

講到咁嘆,其實呢間野除番開每個人都係千一蚊港紙鬆啲(一泊二食連溫泉),計落其實同一般靚啲嘅溫泉酒店比價錢並唔多,所以計埋個景我絕對覺得超值。而正如我頭先所講,雲仙係比長崎更鄉下嘅鄉下地方。所以佢地一般係接待日本客人為主,唔識英文一啲都唔出奇。而且佢地官網雖然有簡、繁中文,英文同埋韓文翻譯,但係佢地嘅預約系統就十年都唔Update一次。真係想book就要去番日文版面然後跪求Google大神, 想去雲仙嘅人要留意啦。

Link: 長崎。雲仙九州飯店

Advertisements

Author: Jonathan Lee

90後港大新鮮失業生 (Fresh Graduate), 一畢業就失業 唔識死唔認命 一口唔咸唔淡無尾音德文, 出走德國Working Holiday一年 係光怪陸離嘅香港拉番我嚟現實之前 堅離地一次

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s