一行兩車四司機夾埋十一人,好好休息一晚之後係時候攞車開始我地嘅自駕遊。
膽粗粗後生仔玩自駕遊,攞車渣車有啲手騰腳震就少不免,咁當然一切安全為上,渣慢啲都無所謂啦。
我地四個司機攞完車,熟習下個GPS,終於咪咪麼麼爬到去Airbnb後街接客。
上曬車,望一望個鐘差唔多食lunch,一於渣去一蘭之森,一蘭嘅博物館連工場餐廳所在地,一報琴日無食到拉麵之仇。
行完博物館,坐低食拉麵,當然嗌番個最元祖嘅拉麵啦。一飲(湯)一啜(麵), 有感水準保持全球一體化品質保證乜乜乜⋯⋯(下刪一萬字)。我食到本地同香港嘅分別,係味道上無分別嘅。不過正面啲咁諗,啫係證明左係香港都食到正宗一蘭風味。不過,其實有樣野香港點學都學唔黎嘅就係,湯底,湯底涉及到用水,而呢樣野唔洗我再多講大家都認同日本嘅水係靚啲啦。而我嘅體會就係,日本做嘅湯底會滑啲濃啲,就是這樣喲,我唔係食評人,將就下啦。
接住落黎,我地繼續駕車橫掃,向虹之松原及唐津城進發。虹之松原係初代唐津藩主為左防風、防潮而沿海岸線種一片松樹林,最後成就左一片綿延5公里、錯落有序嘅綠色地獄(說地獄亦不為過, 因為沿路車途除左樹就係樹)
經過虹之松原駕駛道,直達唐津城。可惜唐津城進行緊復修工程同接近閉館時間,所以我地圍住個城兜下算。
去我地當晚住宿嘅Airbnb之前,我地順路落到伊萬里故鄉村。伊萬里市盛產水果,而且呢度亦都有賣伊萬里牛嘅鋪頭。但係再一次,因為唔熟路,留太耐等等,我地去到只能夠幫見到一兩間未打佯嘅鋪頭,更唔好講新鮮水果已經全部售罄,咁唯有祈待下一個景點啦。
下一個食點,係當晚Airbnb屋主介紹我地去嘅日式燒肉店,呢樣野真係唔話得,亦都令我明白到一樣野,再識飲識食嘅旅遊達人都比唔上當地人介紹你去嘅地方,所以日後當你有機會去旅行同當地人交流,記住問以下呢幾條問題
- 有咩餐廳係你會去/介紹
- 有咩地方你會去
- 有咩野你平時會做
言歸正傳,Yuko (Airbnb屋主)介紹左我地去一間叫 焼肉・音琴 嘅餐廳,我地夾埋叫左5個 4500 Yen 嘅set (佢地提供嘅set 由3000 Yen至8000Yen 不等,每個set 2-3人份)。我只能夠講,四個字,入口即溶。比起之後我地食嘅佐賀牛。季樂 (之後會提及),我只能講有過之而無不及,聽取屋主嘅建議真係無錯 :P。 (其實Yuko 仲介紹左我地一啲溫泉館,奈何我地食完飯已經太夜無去到)
但係飽餐一頓,先係腳震震嘅開始。話說我地當晚嘅住宿係位半郊區嘅地方,連GPS都reach唔到嘅地方,我地一路渣一路就好似秋名山車神咁,渣住兩架唔係AE86係髮夾灣到左擰右擰。去到一條小路邊,GPS指住我地繼續去,而我地亦隱隱約約見到遠處有光,咁唯有硬住頭皮去啦。路越黎越窄,僅僅夠一架車過,周圍一片漆黑,如果對面有迎頭車都唔知點算。GPS個預測距離一點一點咁接近預定地點,我地一路一路慢慢咁渣,卒之去到一間大屋前面,轉過一個僅僅夠一架七人車過角落。我落車膽粗膽粗禁鐘,出黎一個女人:
“Hello, is this Yuko from the Airbnb? I am Jonathan"
“Hi, welcome Jonathan, I am Yuko"
(當時好似係咁。)
聽到佢答呢一句,我真係如釋重負,第二日點樣褪車嘅問題第二日至算啦。我地果晚記得嘅就只有環迴立體蟬聲,同漫天嘅星斗。
PS, 如果你有興趣我當晚住嘅Airbnb,可以去呢度
Airbnb-東彼杵郡
屋主非常好人,相當有善,而且可以英文對答如流,為我地留宿嘅兩日提供一切嘅方便。